Mae Rhwydwaith Ymchwil Iechyd Meddwl Cymru (MHRN-C) wedi cymeradwyo nawdd ar gyfer sefydlu grŵp ymchwil arloesol a gaiff ei arwain gan ddefnyddwyr gwasanaethau a gofalwyr.

Bydd y grŵp newydd, fydd yn gweithredu dan fantell y Rhwydwaith Ymchwil, yn cynnwys nifer o ddefnyddwyr gwasanaethau a gofalwyr sy'n awyddus i dynnu sylw at werth a chanlyniadau tebygol ymchwil a arweinir gan gymheiriaid i iechyd meddwl yng Nghymru.

Cefnogwyd cais y grŵp gan Dr Anne Fothergill, Prif Ddarlithydd Iechyd Meddwl ym Mhrifysgol Morgannwg a Christine Wilson, Cymrawd Ymchwil yn yr un brifysgol.

Bydd y gydweithfa ymchwil newydd yn cael ei hwyluso gan John Abbott, Rheolwr Ymgyrchoedd Hafal, prif elusen Cymru ar gyfer pobl gydag afiechyd meddwl difrifol a'u gofalwyr (a hefyd y prif sefydliad o ran cynnwys defnyddwyr a gofalwyr yn y Rhwydwaith Ymchwil). Bydd cefnogaeth academaidd ychwanegol ar gael i'r grŵp newydd o du mewn i'r Rhwydwaith Ymchwil.

Wrth drafod y newyddion, dywedodd John Abbott: "Bydd y grŵp ymchwil newydd yn anfon eu cais am aelodau a chefnogaeth allan ar draws Cymru gyfan, ac er bod sawl rhwystr i'w groesi o'n blaen, rydym yn gobeithio gallu sicrhau arian ychwanegol er mwyn cryfhau'r grŵp a chychwyn ymchwil Iechyd a Gofal Cymdeithasol defnyddiol ym maes Iechyd Meddwl yng Nghymru erbyn diwedd y flwyddyn."

Am ragor o wybodaeth, cysylltwch â John Abbott yn Hafal: johnabbott@hafal.org neu Dr Anne Fothergill ym Mhrifysgol Morgannwg: afotherg@glam.ac.uk

Yn y llun o'r chwith i'r dde: Dr Anne Fothergill, Vicky Yeates (Gofalwr ac Uwch Ddarlithydd y Gyfraith ym Mhrifysgol Caerdydd), Brian Mitchell (Defnyddiwr Gwasanaethau ac Aelod o Hafal), John Abbott, Julian Evans (Defnyddiwr Gwasanaethau ac aelod o Interlink).