Bydd yr heriau a wynebir gan bobl sy’n gwella o afiechyd meddwl difrifol yn un o nifer o faterion i gael eu trafod yng nghynhadledd hydref Hafal, a gynhelir yn fuan. Cynhelir y digwyddiad ar ddiwedd un o’r blynyddoedd mwyaf allweddol yn hanes y sector iechyd meddwl yng Nghymru.
Cerrig milltir deddfwriaethol, ymgyrchoedd llwyddiannus, trafodaethau eang a’r posibilrwydd o ddeddfau iechyd meddwl newydd – bu’n flwyddyn hynod brysur, a bu Hafal, prif elusen Cymru ar gyfer pobl sy’n dioddef o afiechyd meddwl difrifol a’u gofalwyr, ar flaen y gad gyda’r rhan fwyaf o’r gwaith yma.
Mae cynhadledd eleni, a gynhelir ddydd Iau, Tachwedd 13eg yn y Pafiliwn, Llandrindod, yn siwr o fod yn ddigwyddiad bywiog a lliwgar. Bydd yr uchafbwyntiau’n cynnwys:
· Arddangosfa ffotograffiaeth yn dathlu ymgyrch gwrth stigma Hafal, “Ydych chi wedi Clicio?”;
· Gweithdy a sesiynau trafod yn cynnwys gweithwyr iechyd proffesiynol mwyaf blaenllaw Cymru;
· Gweithdy gan yr asiantaeth hysbysebu gofal iechyd gwobrwyedig, Langland;
· “Anarchiaeth Arlunio”, cyfle i ddefnyddwyr gwasanaethau Hafal fynegi eu hunain gyda phaent;
· Sesiwn flasu Tai Chi;
· Cyfle i archwilio ffyrdd o gyfathrebu’n effeithiol gyda’r cyhoedd am faterion iechyd meddwl.
Bydd elfen greadigol gryf i weithgareddau’r gynhadledd eleni, a’r prif atyniad fydd arddangosfa arbennig o ymgyrch gwrth stigma boblogaidd Hafal, “Ydych chi wedi Clicio?”. Nod yr ymgyrch oedd annog defnyddwyr gwasanaethau, gofalwyr a’r cyhoedd i gymryd lluniau gyda’u camerâu, ac wrth wneud hynny, godi ymwybyddiaeth am faterion iechyd meddwl yng Nghymru.
Cafodd y detholiad amrywiol iawn o ffotograffau a gasglwyd o ganlyniad i’r ymgyrch, eu harddangos yn y Senedd i gofnodi Diwrnod Iechyd Meddwl y Byd. Cynhaliwyd hyn yn dilyn cyfres o ddigwyddiadau a gweithdai ym mhob un o siroedd Cymru.
Cafodd yr arddangosfa, a lansiwyd gan y Gweinidog Iechyd a Gwasanaethau Cymdeithasol, Edwina Hart AC, lawer o sylw gan Aelodau’r Cynulliad a’r cyhoedd yn gyffredinol.
Bu’r arddangosfa’n destunau un o adroddiadau’r rhaglen deledu am wleidyddiaeth Cymru, am:pm ac, yn fwy diweddar, cafodd rhai o ffotograffau gorau’r ymgyrch eu dangos mewn dwy arddangosfa ffotograffiaeth fawreddog a gynhaliwyd gan y BBC yng nghanol dinasoedd Caerdydd ac Abertawe.
Mae’n amlwg bod llawer i edrych yn ôl arno, a llawer i edrych ymlaen ato hefyd yn y sector iechyd meddwl yng Nghymru, a bydd croeso mawr i aelodau’r cyfryngau yng nghynhadledd Hafal.
“Mae hi wedi bod yn gyfnod arwyddocaol iawn i iechyd meddwl yng Nghymru,” meddai Cadeirydd Hafal, Peter Davey.
“Bydd yn cael ei chofio fel y flwyddyn pan gafwyd cyfle am newid gwirioneddol – a’r flwyddyn y gwnaeth Hafal ddatblygiadau mawr wrth lunio dyfodol gwasanaethau iechyd meddwl.”
