Chwith: Janet Davies (Cydlynydd PET ), Barbara Ballinger (Cadeirydd Aelodau TRI) ac Alan James (Is-Gadeirydd Aelodau TRI)

Y mis diwethaf, cyflwynodd y Cydlynydd PET, Janet Davies, dystysgrifau enwebu i ddysgwyr Hafal yn Ninbych-y-pysgod ar gyfer gwobrau Ysbrydoli NIACE.  Mae’r gwobrau’n dathlu cyflawniadau dysgu unigolion a grwpiau cymunedol.

Bu dysgwyr Hafal yn cymryd rhan yn y Prosiect PET, sef menter a ariennir gan ESF ac sydd wedi’i hanelu at ddarparu cyfleoedd dysgu o safon, gyda chymwysterau cydnabyddedig cenedlaethol mewn lleoliadau cymunedol lleol.  Gweithiodd tîm prosiect PET mewn partneriaeth agos â staff Canolfan Galw Heibio Hafal yn Ninbych-y-pysgod (TRI) er mwyn cynnal cwrs ‘Dod i Adnabod Cyfrifiadur’.  Cwblhaodd tri grŵp y cwrs, a symudodd bron bob aelod ymlaen i gyrsiau OCN eraill yn y Ganolfan Ddysgu Gymunedol gyfagos yn Ninbych-y-pysgod.

Cynigiodd PET a Hafal y cyrsiau canlynol i gleientiaid hefyd:

• Ymarfer Ysgafn a Bwyta’n Iach (Arberth)
• Celf a Chrefft - Grŵp Merched
• Grŵp Ysgrifennu Creadigol yn TRI
• Adeiladu Hyder yn TRI - dau gwrs ar wahân yn cynnig 15 o lefydd i unigolion.

Pan ofynnwyd beth roeddynt wedi’i gyflawni yn y prosiect, dywedodd un o’r cleientiaid: “Rwyf wedi dysgu sgiliau newydd ac rwyf yn fwy hyderus ar y cyfrifiadur ac yn tynnu lluniau.

“O wneud dosbarthiadau yn TRI, mae aelodau wedi mynd ymlaen i wneud cyrsiau yn ein coleg lleol, ac mae un hyd yn oed wedi mynd i weithio ar lefel gradd.

“Y peth gorau am fynychu prosiect Hafal yw’r teimlad o gwmnïaeth.  Rwyf wedi gwneud ffrindiau da ac wedi cyfarfod pobl sydd wedi bod drwy broblemau tebyg i fi.

“Mae Hafal yn sefydliad gwych, yn gefnogol iawn.  Mae yno bob tro amrywiaeth o weithgareddau ar wahanol lefelau, ac nid cefnogi pobl gyda phroblemau iechyd meddwl yn unig y maen nhw, ond hefyd y gofalwyr.”