Ar eich marciau: digwyddiad ‘Caffael ar y Corfforol!’ 2019 Hafal i’w gynnal yn Abertawe wythnos nesaf!

Bydd defnyddwyr gwasanaeth iechyd meddwl a gofalwyr yn cael y cyfle i gymryd rhan mewn amryw o ddigwyddiadau chwaraeon trac a maes yn nigwyddiad ‘Caffael ar y Corfforol!’ De Cymru, sydd i’w gynnal gan Hafal yng Nghanolfan Chwaraeon Prifysgol Abertawe, ar ddydd Iau, 5 Medi 2019 rhwng 10:30am a 3:30pm.

Bydd y digwyddiad yn denu mwy na 300 o ddefnyddwyr gwasanaeth a gofalwyr o  holl ardaloedd De Cymru ac yn rhoi’r cyfle iddynt i roi cynnig ar amryw o chwaraeon a gweithgareddau gan gynnwys:-

  • 100m
  • Ras wy a llwy
  • Rasio ceffylau
  • Ras gyfenwid
  • Gwaywffon
  • Boules
  • Ciciau o’r smotyn
  • Tenis bwrdd
  • Bikeability
  • Taflu pwysau
  • Naid hir
  • Naid uchel
  • Tynnu rhaff
  • Tai Chi
  • Cerdded Nordig

…neu Ewch amdani gyda SMWDDI iachus

Bydd y gwesteion yn cynnwys Llysgennad Hafal a chwedl rygbi Cymru, Dafydd James, ynghyd ag aelodau o dîm rygbi’r Gweilch.

Bydd nifer o fudiadau yn y digwyddiad yn darparu gwybodaeth a stondinau yn cynnig cyngor  gan gynnwys:-

  • Y Ganolfan Genedlaethol ar gyfer Iechyd Meddwl
  • Yfed Doeth – Heneiddio’n Dda
  • Bikeability
  • Cadw’n Ddiogel Cymru
  • Strôc Cymru  
  • Prifysgol Abertawe (Swansea University)
  • Include
  • Cyfle Cymru
  • Gwasanaethau Cymorth Iechyd Meddwl Cynradd Abertawe
  • Gwasanaeth Achub Tân Canolbarth a Gorllewin Cymru
  • Remploy
  • Alabare Wales Homes for Veterans

Mae’r digwyddiad ‘Caffael ar y Corfforol’ wedi ei ddylunio i ychwanegu at y cymorth sydd yn  cael ei ddarparu i gleientiaid a gofalwyr fel rhan o wasanaethau lleol Hafal er mwyn eu helpu i wneud cynnydd ym meysydd iechyd corfforol a lles eu Cynlluniau Adferiad.

Yn ogystal â rhoi cynnig ar rai gweithgareddau corfforol llawn hwyl, bydd unigolion hefyd yn cael y cyfle i dderbyn gwybodaeth, cyngor a chyfarwyddyd ynglŷn â sut y mae modd iddynt gymryd camau bychain er mwyn cynnal iechyd da drwy fwyta’n fwy iachus, gwneud mwy o weithgareddau corfforol a chael archwiliadau iechyd cyson.

Dywedodd Prif Weithredwr Hafal Alun Thomas: “Mae’r digwyddiad ‘Caffael ar y Corfforol!’ yn hynod boblogaidd gan ei fod yn llawn egni a’n llawn hwyl. Mae pobl  yn medru cael gafael ar wybodaeth a chyngor ynglŷn â sut y mae modd iddynt wella eu hiechyd corfforol, ynghyd â chwrdd ag amryw o bobl newydd, a chymryd rhan wrth gwrs, mewn nifer o chwaraeon a gweithgareddau. Y peth gorau am y diwrnod yw bod unrhyw un yn medru cymryd rhan – nid oes rhaid i chi fod yn athletwr, dim ond bod yn hapus i roi cynnig ar bethau!”